‘D’n Opstaekerᵀᵐ 2021’ een ontwerp van Jos Cremer

Wie de vastelaovend d’r ’t kômmend seizoén oét geit zeen, wet nag neemes. Toch haet beeldend kunstenaer Jos Cremers oét Tegele vur de kômmende vastelaovend d’n Opsjtaeker 2021 ôntworpe.

“Roy Peters, de vors van Vastelaovesgezelsjap d’n Oeles oét Tegele, haet mich gevraog of ich dae wôl ôntwerpe en dao-op bön ich hiel gruëts.”

Cremers mak dees broche oét naam van alle viéf de sjtadsdeilvereiniginge. “Idderein, groët of klein in de ganse gemeinte, druëg d’r immers toe beej, det de vastelaovend ein fiës wuërdt. Laot daorum dezen Opsjtaeker, vur idderein dae de vastelaovend ein werm hert toedruëg, einen echten opsjtaeker zien….. ouch al zal dit fiës in 2021 angers zien den in veurgaonde jaore”.

“t Is ein hiele prestaasie-j, det we met zien alle d’n Opsjtaeker anno 2021 hebbe kunne realiseere. Ich maak immers noëit teikeninge van mien kreejasie-js. Ich heb ‘nnen hômp klei gepak en bön gaon boetseere. Oéteindelik môste we van ein dreej dimensjonaal beeld truuk nao ein twië dimensjonaal sjpeldje met get reliëf aksente. Volges mich is det hiel good gelök.” Cremers haet altiéd vastelaovend gevierd. “Vur mich sjteit det geliék met fiës op sjtraot, remmiedemmie en vuël humor. Det letste is ouch truuk te vinge in mien werk. De figure die ich maak, zien altiéd komies en kleurriék. Op d’n Opsjtaeker zien twië humoristiese muzikante te zeen met deksels en ‘n dieke trôm en viéf puuzelsjtökskes, die as konfetti op eur neerdale. Die puuzelsjtökskes zien de viéf sjtadsdeile van de gemeinte Venlo, die met vastelaovend inein passe, zoëdet d’r ein groët fiës ôntsjteit”, aldus de kunstenaer.

Zien motto luudt: same gaon weej ’t make, groët of klein, weej hebbe gein!

JosCremers
 

D’n Opsjtaeker is ’n saort broche die sjteit vur ’n dreejtal zake: einem bliék van waardering vur de vuële vreejwilligers die allerlei carnavalsaktiviteite organiseere in de sjtadsdeile Venlo, Bliërick, Tegele, Belfeld en Arcen & Velden; einem bliék van betrokkenheid met dae vastelaovend en eine finansjeelen opsjtaeker vur alle vastelaovesgezelsjappe oét dees regio. Die viéf vereiniginge haope det de inwoëners juus nôw massaal dees vastelaovesbroche zulle koupe um zoë de versjillende gezelsjappe te ôngersjteune.

Jos Cremers (1959) werk in zien dageliks laeve met kinger die ekstra zorg nuëdig hebbe. Daonaeve werk hae as beeldend kunstenaer, ein passie die hae op ziene 40e haet ôntdek. Jos is autodidakt. De basis van zien keramiese kennis haet-e opgedaon in de Tiendschuur in Tegele. Zien werk is herkenbaar en uniek. Inspiraasie-j haolt Jos door te kiéke nao de minse um zich haer. Hae versjteit de kuns um ’t gedraag van minse zoëwaal letterlik as figuurlik op ein humoristiese wiéze oét te beelde. De aafgeloupe jaore haet Cremers op tig plaatse ge-eksposeerd. Taengeswaordig zien zien kreejasie-js ouch te bewôngere in Galerie Tegelen. Miër informaasie-j euver Jos Cremers is te vinge op www.joscremers.nl .

D’n Opsjtaeker 2021 zal op d’n Elfde van d’n Elfde waere gepresenteerd. Vanaaf daen datum is-e ouch te koup vieja de versjillende websites van de vastelaovesgezelsjappe, ’n groët aantal winkels en tiédens meugelikke vastelaovesaktiviteite.